អធិការកិច្ចចុះពិនិត្យ GMP នៅសហគ្រាសផលិតឱសថប៉េប៉េអឹម
កាលបរិច្ឆេទ: ១៩ ធ្នូ ២០២៣ / សុខភាព / Author : Veng Thavong
ក្នុងឱកាសចុះធ្វើអធិការកិច្ចប្រចាំឆ្នាំកាលពីថ្ងៃទី៤ ខែធ្នូ កន្លងទៅនេះ ក្រុមអធិការមកពីនាយកដ្ឋានឱសថ ចំណីអាហារ និងគ្រឿងបរិក្ខារពេទ្យនៃក្រសួងសុខាភិបាលបានចុះត្រួតពិនិត្យរោងចក្រសហគ្រាសផលិតឱសថប៉េប៉េអឹម និងទទួលស្គាល់ថាសហគ្រាសពិតជាឆ្លើយតបទៅនឹងបទដ្ឋាន«ការអនុវត្តផលិតកម្មល្អ»មែន។
រយៈពេលពេញមួយព្រឹក អធិការចំនួន៧រូបបានពិនិត្យមើលឯកសារ និងដើរត្រួតពិតនិត្យមើលតាមកន្លែងផលិត បន្ទប់ពិសោធន៍វិភាគ Labiocert និងកន្លែងស្តុកទំនិញ មុននឹងទទួលស្គាល់ថាមានការអនុវត្តផលិតកម្មល្អ។
អង្គការសុខភាពពិភពលោកចាត់ទុកការអនុវត្តផលិតកម្មល្អជា«ផ្នែកមួយសម្រាប់ធានាពីគុណភាព ការជាបញ្ជាក់ថាផលិតផលត្រូវបានផលិត និងត្រួតពិនិត្យដោយឆ្លើយតបទៅនឹងបទដ្ឋានគុណភាពស្របទៅនឹងតម្រូវការប្រើប្រាស់ និងអាចដាក់ឲ្យធ្វើអាជីវកម្មនៅលើទីផ្សារបាន»។
ការអនុវត្តផលិតកម្មល្អសំដៅទៅលើចំណុចគ្រប់យ៉ាងនៃដំណើរការផលិត និងការត្រួតពិនិត្យដូចជា ដំណើរការផលិតជាក់លាក់ និងតំណាក់កាលនីមួយៗត្រូវបានទទួលការអនុញ្ញាត ទីតាំងផលិត កន្លែងស្តុកទំនិញ និងការដឹកជញ្ជូនសមស្របតាមលក្ខខណ្ឌដែលតម្រូវ បុគ្គលិកផ្នែកផលិត និងត្រួតពិនិត្យគុណភាពទទួលបានការបណ្តុះបណ្តាលត្រឹមត្រូវ និងមានសមត្ថភាពគ្រប់គ្រាន់ គ្រឿងបរិក្ខារគ្រប់គ្រាន់ និងត្រឹមត្រូវតាមលក្ខខណ្ឌដែលតម្រូវ ឯកសារសរសេរទាក់ទងនឹងសេចក្តីណែនាំ និងនីតិវិធីប្រតិបត្តិការត្រូវបានទទួលស្គាល់ថាពិតជាត្រឹមត្រូវល្អ មានព័ត៌មានពេញលេញទាក់ទិននឹងទំនិញតាំងពីមុនផលិតរហូតដល់ពេលក្រោយផលិត មានប្រព័ន្ធគ្រប់គ្រង និងត្រួតពិនិត្យសំណើសុំដំណោះស្រាយពេលមានបញ្ហា មានប្រព័ន្ធសវនកម្មផ្ទៃក្នុងដែលអាចផ្ទៀងផ្ទាត់លើការអនុវត្ត និងត្រួតពិនិត្យផ្នែក GMP៕